Եվրոպայի խորհրդի կողմից ֆինանսավորվող «Ժողովրդավարական զարգացում, ապակենտրոնացում և լավ կառավարում Հայաստանում – Փուլ 2» ծրագրով իրականացվող «Միջհամայնքային կամ անդրսահմանային համագործակցության տեխնիկատնտեսական ուսումնասիրության» դրամաշնորհի շրջանակներում «Նոր զբոսաշրջային երթուղի» ծրագիրը միտված էր միջհամայնքային համագործակցության միջոցով ուսումնասիրելու, բացահայտելու զբոսաշրջության ոլորտը տարածաշրջանում (հաշվի առնելով, որ միջհամայնքային համագործակցությունը Վեդի և Արտաշատ համայնքների միջև էր) և այդ ոլորտի հիմնախնդիրներին ուղղված բովանդակային և գործնական լուծումներ գտնելուն:
Տեխնիկատնտեսական ուսումնասիրությունը հիմնված է միջհամայնքային համագործակցության վրա՝ Վեդի և Արտաշատ համայնքների միջև: Բացի համայնքապետարանի աշխատակազմից ծրագրի աշխատանքային խմբում ներգրավվել են 3 փորձագետներ՝ տնտեսական, բնապահպանական և զբոսաշրջության ոլորտներից: ՄՀ շրջանակներում իրականացված տեխնիկատնտեսական ուսումնասիրության արդյունքում կազմվել է «ՀՀ Արարատի մարզի Վեդի համայնքի զարգացման տեսլականը զբոսաշրջության խթանման միջոցով 2024-2028 թվականներին» հետազոտությունը:
Հետազոտության նպատակն է դիտարկել համայնքների բնական, մշակութային ներուժը՝ որպես տնտեսության այլընտրանքային զարգացման միջոց, ինչը կենսակայուն միջավայր կձևավորի համայնքների և հարակից բնակավայրերի համար։
Ծրագրի նպատակի, խնդիրների, դրանց լուծումների ձևավորման նպատակով տեղի են ունեցել հանդիպումներ համայնքապետարանի և համայնքի ոլորտային տնտեսվարողների ներկայացուցիչների հետ, այցեր բնակավայրեր և թիրախային տեսարժան վայրեր, երիտասարդների ներգրավում համայնքում զբոսաշրջության հիմնախնդիրների բացահայտման և տեսարժան վայրերի տեսանելիության բարձրացման հարցում։ |