| Բովանդակություն * | Ս/թ-ի հուլիսի 8-ին, համայնքի ղեկավարի նախաձեռնությամբ տեղի ունեցավ աշխատակազմի Քաղաքաշինության և հողաշինության բաժնի մասնակցությամբ գործակարգավարական նիստ, որին մասնակցում էին նաև համապատասխան բաժինը համակարգով համայնքի ղեկավարի տեղակալ Բ.Շահինյանը, աշխատակազմի քարտուղարը: Խոսքով հանդես եկավ համայնքի ղեկավար պարոն Գ.Սարգսյանը, ով անրադարձավ բաժնի կողմից կատարման ենթակա հանձնարարականների կատարման ընթացքին, նշեց, որ անհրաժեշտ է սեղմ ժամկետում միջոցներ ձեռնարկել բաժնին տրված հանձնարարականների կատարման ուղղությամբ, հաշվի առնելով այն հանգամանքը, որ իրականացված ուսումնասիրության արդյունքում պարզվել է, որ տրված հանձնարարականների գերակշիռ մասի կատարման ընթացքում խախտվում են համայնքի ղեկավարի 15.12.2023 թվականի N 2522-Լ և 11.11.2024 թվականի N 2089-Ա որոշումներով հաստատված Կարգերի դրույթները:
Նշեց, որ համայնքի ղեկավարության կողմից տրված հանձնարարականները պարտադիր կատարման ենթակա են դրանցում նշված ժամկետներում, որ անթույլատրելի է նման գործելաոճի դրսևորումը անհրաժեշտ է մշտապես հետևողական աշխատանքներ կատարել իրենց հանձնարարված աշխատանքները սահմանված կարգով և ժամկետներում կատարելու համար: Համայնքի ղեկավարը ներկաների ուշադրությունը հրավիրեց նաև քաղաքաշինության ոլորտում առկա խնդիրներին, նշեց, որ պետք է պարբերաբար շրջայցեր կատարել համայնքի կազմում ընդգրկված բնակավայրեր, առկա խնդիրների վերհանման և դրանց համակարգային լուծում տալու ուղղությամբ:
Համայնքի ղեկավարը կարևորեց այդ աշխատանքների կատարման գործում աշխատակազմի համապատասխան ստորաբաժանումների ու վարչական ղեկավարների համագործակցությունը՝ հայտնաբերելու և կանխարգելելու ՀՀ օրենսդրությամբ և համայնքի ավագանու որոշումներով սահմանված կարգի խախտումներով քաղաքաշինության ոլորտում գործունեության իրականացումը:
Ամփոփելով խորհրդակցությունը, համայնքի ղեկավարի կողմից կատարման համար տրվեցին համապատասխան հանձնարարականներ: |