Ս/թ-ի փետրվարի 25-ին, համայնքի ղեկավարի նախաձեռնությամբ տեղի ունեցավ աշխատակազմի Եկամուտների հաշվառման,հավաքագրման և առևտրի սպասարկման բաժնի (այսուհետ՝ Բաժին) գործառույթներից բխող գործակարգավարական նիստ, որին մասնակցում էին աշխատակազմի քարտուղարը, Բաժնի պետը և համայնքի վարչական տարածքում աղբահանության և խմելու ջրի դիմաց վճարների գանձման գործառույթները համակարգողները:
Խոսքով հանդես եկավ համայնքի ղեկավար պարոն Գ.Սարգսյանը, ով ներկայացրեց խորհրդակցության օրակարգը, նշելով, որ ս/թ-ի հունվար և փետրվար ամիսներին աղբահանության և խմելու ջրի հավաքագրման աշխատանքներն արդյունավետ չեն կազմակերպվում, նշեց, որ անհրաժեշտ է հետևողական աշխատանքներ տանել սահմանված վճարների գանձման ուղղությամբ:
Բաժնի պետ Մ.Ղազարյանը ներկայացրեց ս/թ-ի հունվար և փետրվար ամիսների հավաքագրման ցուցանիշները, նշեց, որ հավաքագրման աշխատանքների ցածր ցուցանիշը պայմանավորված է հիմնականում բնակավայրերում փոստային կենտրոններում խմելու ջրի և աղբահանության վճարների վերաբերյալ համապատասխան հավելվածների բացակայությամբ կամ թերի աշխատանքով, որոշ դեպքերում էլ քաղաքացիների դժգոհությունը պայմանավորված է վճարվող գումարներից պահվող միջնորդավճարների չափով:
Հավաքագրողների կողմից հարց բարձրացվեց այն մասին, որ համայնքի տարածքում կան տնտեսվարող սուբյեկտներ և քաղաքացիներ, ովքեր հրաժարվում են մատուցված աղբահանության ծառայությունների դիմաց համապատասխան վճարումներ կատարելուց, խնդրեցին որպեսզի վերջիններիս նկատմամբ ձեռնարկվեն համապատասխան միջոցներ:
Խորհրդակցության ավարտին համայնքի ղեկավարի կողմից կատարման համար տրվեցին համապատասխան հանձնարարականներ: |